Ang maaksyong pananaliksik na ito ay naglalayong paunlarin ang kasanayan sa wikang Filipino ng mga mag-aaral sa sekondarya partikular na sa kanilang komprehensyon sa pagbasa. Ang interbensyong PEER UP (Practice and Enhance through Engaging in Reading Using Peer-Tutoring), ay nakatuon sa pag-unawa sa pagbasa ng mga mag-aaral na kung saan kolaboratibong magtutulungan ang mga mag-aaral sa pagkatuto. Ang pag-aaral na ito ay gumamit ng pre-experimental na disenyo na kung saan ito ay gumamit ng one group pre-test and post-test na pamamaraan. Ang disenyong ito ay gumamit ng pre-test pagkatapos ay isinagawa ang interbensyon at magkakaroon ng isang post-test. Ang mga respondente na napabilang sa eksperimental na grupo ay ang mga mag-aaral sa ikasampung baitang, seksyon Neon ng Kapalong National High School. Natuklasan sa resulta ng pag-aaral na ang antas ng kasanayan sa pagbasa ng mga mag-aaral sa pre-test ay inilalarawan na katamtaman samantalang ang naging resulta sa post-test ay mataas. Lumalabas na mayroong makabuluhang pagbabago sa pagitan ng pre-test at post-test ng mga mag-aaral mula sa eksperimental na grupo matapos ang isinagawang interbensyon. Samakatuwid, ang peer-tutoring ay isang epektibong pamamaraan upang mapalakas at mapaunlad ang kasanayan sa pagbasa at pag-unawa ng mga mag-aaral sa asignaturang Filipino. Kung kaya, iminumungkahi ng mga mananaliksik na ipatupad ang peer-tutoring, ito man ay dalawahan o pangkatan upang mas maging makabuluhan ang pagkatuto ng mga mag-aaral. Ito rin ay gawing pagsasanay sa loob ng klase.