Ang pananaliksik na ito ay naglalayong makagawa ng isang pagsusuri sa mga uri ng tayutay at epekto nito sa pagbuo ng kahulugan sa isang tula. Ang pananaliksik na ito ay ginamitan ng kwalitatibong pamamaraan gamit ang dulog na diskursong pagsusuri (discourse analysis) upang makagawa ng pagsusuri at pag-aanalisa sa 51 na tula bilang korpora na gagamitin sa pag-aaral na nakalap mula sa lipon ng mga tula ni Jose Corazon de Jesus. Batay sa resulta, napag-alamang, una, mayroong labing-anim (16) na tayutay ang namukod sa ginawang pagsusuri sa mga piling tula tulad ng pagtutulad, pagbibigay-katauhan, pagmamalabis, paghihimig, pagpapalit-tawag, pagtawag, pagwawangis, aliterasyon, anapora, anadiplosis, pag-uyam, pagtatambis, pagpapalit-saklaw, pangitain, paglumanay at pagtatanong. Ikalawa, ang epekto sa pagkakaroon ng kaalaman sa tayutay sa pagbuo ng kahulugan sa isang tula ay nakapagpapahayag ng kaisipan, nakapagpapahayag ng damdamin, nakapagdadagdag ng kagandahan sa tula, nakapagdadagdag ng kabisaan sa likha at nakapagbibigay simbolismo. Sa pananaliksik na ito, madadagdagan at mapapabuti ang kaalaman sa pagtukoy ng tayutay sa isang tula at epekto nito sa pagbuo ng kahulugan sa isang tula.