Layunin ng penomenolohiyang pananaliksik na ito ay masuri, matukoy, at maunawaan ang karanasan ng labing-apat (14) na mag-aaral sa Senior High School sa paggamit ng ChatGPT sa pagsasalin-wika sa pagsulat ng akademikong sulatin sa Filipino sa pribadong paaralan ng Lungsod ng Tagum. Dagdag pa, ang ginawang pananaliksik ay makapagbibigay-gabay tugon at solusyon sa mga hamong nararanasan ng mga mag-aaral sa paggamit ng ChatGPT sa pagsasalin-wika sa pagsulat ng akademikong sulatin sa Filipino. Ang labing-apat (14) na naging partisipante sa penomenolohikal na pag-aaral na ito ay pinili gamit ang purposive sampling. Ang mga tugon na nakalap gamit ang pinalalim na panayam at pangkatang talakayan ay sinuri gamit ang tematikong pag-aanalisa. Ang mga nasuring pahayag tungkol sa karanasan ng ng mga mag-aaral sa pagsasalin-wika gamit ang ChatGPT sa pagsulat ng akademikong sulatin sa Filipino ay: napadali ang pagsasalin, nakakuha ng pinakamalapit na salin, at nakaranasan ng teknikal na isyu. Tungkol naman sa tanong kung anong mga solusyong inilapat ng mga mag-aaral sa paggamit ng ChatGPT sa pagsasalin-wika ang mga nabuong tema ay: paggamit ng kritikal na pag-iisip, paghahanap ng iba pang sites sa pagsasalin, at sariling pagwawasto ng mga isinalin. Ang mga pangunahing tema na: kapakinabangan sa akademikong komunidad, tulong sa pagpapalawak ng kaalaman, gamit ng ChatGPT sa responsableng pamamaraan, at epekto sa kasanayang kognitibo ang lumitaw tungkol sa posibleng pananaw ng mga mag-aaral sa paggamit ChatGPT sa pagsasalin-wika sa pagsulat ng akademikong sulatin sa Filipino.