Ang pananaliksik na ito ay naglalayong matukoy ang ugnayan ng kasanayang panggramatika at antas ng pag-unawa sa mga akdang pampanitikan ng mga mag-aaral sa Baitang 10 ng Philippine Yuh Chiau School, Inc. upang makabuo ng mga interbensyon sa pagtuturo ng wika at panitikan. Sinuri rin sa pag-aaral ang kaugnayan ng ilang personal at panlipunang salik ng mga mag-aaral gaya ng kasarian, unang wika, uri ng babasahing ginagamit, antas ng paggamit ng social media, edukasyon at hanapbuhay ng mga magulang, at buwanang kita ng pamilya. Gamit ang deskriptib-korelasyonal na disenyo, isinagawa ang pagsusuri sa pamamagitan ng gurong-gawang pagsusulit sa kasanayang panggramatika at pag-unawa sa panitikan. Ipinakita ng resulta na may makabuluhang ugnayan ang kasanayang panggramatika sa pag-unawa sa panitikan. Natukoy na ang kasarian, uri ng binabasa, at antas ng paggamit ng social media ay may kaugnayan sa kasanayang panggramatika at pag-unawa sa panitikan. Samantala, natukoy ding may bahagyang epekto ang hanapbuhay ng ama sa antas ng pag-unawa sa panitikan. Bunga ng mga natuklasan, iminungkahi ang mga interbensyong tutugon sa pangangailangan ng mga mag-aaral.