Ginamit sa pag-aaral na ito ang kuwalitatibo at naratolohikal na disenyo upang galugarin, ilarawan, at maisalaysay ang mga kabiguan, tagumpay, at aral ng mga gurong tagapagsanay sa patimpalak na “Iispel Mo!” sa pagtuturo ng Ortograpiyang Filipino. Tatlong gurong tagapagsanay mula sa pampublikong paaralan sa Lungsod ng Mati ang kalahok, na binigyang-palayaw na Maalab, Magiliw, at Mapagpunyagi. Lumabas na ang mga kabiguan ng mga tagapagsanay ay nauugnay sa kakulangan ng oras, mababang kumpiyansa at pag-unawa sa wika, pagkatalo sa kompetisyon, at kakulangan ng sariling kakayahan. Sa kabila nito, nakamit nila ang tagumpay sa pamamagitan ng mataas na marka ng mga mag-aaral, pag-unlad sa kasanayan sa pagsulat at pagsasalita, paglago ng kumpiyansa, at aktibong pakikilahok sa klase. Mula sa mga karanasang ito, natutuhan ng mga kalahok ang pagkakaroon ng malinaw na layunin sa pagtuturo, pagiging malikhain at mapanuri, pagpapakita ng simpatiya sa mag-aaral, pagtataguyod ng pananagutan, at pagpapahalaga sa Wikang Filipino. Binibigyang-diin ng pag-aaral ang pangangailangang palakasin ang suporta at pagsasanay sa mga gurong tagapagsanay upang higit na mapaunlad ang pagtuturo at pagkatuto ng mga mag-aaral sa Ortograpiyang Filipino.